మేడ్చల్- మల్కాజ్గిరి జిల్లా మండల పరిధిలోని మూడుచింతల పల్లి శివారులో బృహత్ శిలా(ఇనుప) యుగానికి చెందిన అతిపెద్ద రాతి రేఖా చిత్రం బయట పడింది. పురావస్తు పరిశోధకుడు, ప్లీచ్ ఇండియా ఫౌండేషన్, సిఈఓ, ఈమని శివనాగిరెడ్డి దీనికి సంబంధిచిన వివరాలు తెలిపారు. షామీర్ పేట- బొమ్మల రామారం మార్గంలోని మూడుచింతల పల్లి శివారులో రోడ్డుకు ఎడమవైపున రాతిపై వృత్తాకారపు రేఖాచిత్రం ఉందని రామోజు హరగోపాల్ నేతృత్యంలోని కొత్త తెలంగాణ చరిత్ర బృందం సభ్యులు కొరవి గోపాల్, మహమ్మద్ నజరుద్దీన్, అహోబిలం కరుణాకర్, అన్వర్ భాష ఇచ్చిన సమాచారం ఆధారంగా శివనాగిరెడ్డి వారితో కలిసి ఆ రేఖా చిత్రాన్ని క్షుణ్ణంగా పరిశీలించారు. కొద్దిపాటి ఎత్తు ఉన్న గ్రానైట్ కొండపై 7.5 మీ. వ్యాసంతో, 30 సెంటీమీటర్ల మందంతో చుట్టూ ఒక వలయంతో, మధ్యలో రెండు త్రిభుజాకారాలతో ఉన్న వృత్తం ఆధునిక పరికరాలతో గీయించినంత అందంగా ఉందన్నారు.
ఈ వృత్తానికి సమీపంలో కొత్త రాతి యుగపు రాతి గొడ్డళ్లు అరగ దీసిన గాళ్లు, 1 కి. మీ. పరిధిలో శిలాయుగపు ఎద్దులు, దుప్పులు, మనుషుల వర్ణ చిత్రాలు ఉన్న కొండచారియ, గుహ ఆవాసాలు ఉన్నాయని శివనాగిరెడ్డి తెలిపారు.మూడుచింతల పల్లి వృత్తకారపు రేఖాచిత్రం ఏ కాలనికి చెందిందని, ప్రముఖ పురావస్తు, శిలాయుగ చిత్రకళ నిపుణులు, ఆచార్య రవి కోరిశెట్టార్ నుప్రశ్నించగా, ఆ రేఖ చిత్రం క్రీస్తు పూర్వం 1000 సంవత్సరాల నాటి ఇనుప యుగానికి చెందిందని, ఆ కాలపు ప్రజలు, గుండ్రంగా నిర్మించుకునే సమాధులకు ఒక నమూనాగా ఉపయోగపడి ఉంటుందని చెప్పారన్నారు. హైదరాబాద్ నగరానికి 30-40 కిలోమీటర్ల దూరంలో ఉన్న అరుదైన ఈ పురా చిత్ర స్థావరాన్ని ఆర్కియాలజీకల్ టూరిజం కేంద్రంగా అభివృద్ధి చేయవచ్చని, ఇంతటి చారిత్రక ప్రాధాన్యత గల స్థావరాన్ని కాపాడుకొని భావితరాలకు అందించాలని మూడుచింతలపల్లి గ్రామస్తులకు శివనాగిరెడ్డి విజ్ఞప్తి చేశారు. ఇంత పెద్ద చిత్రం రెండు తెలుగు రాష్ట్రాల్లోనూ లేదంటున్న పురావస్తు పరిశోధకులు తెలిపారు.
