“తమ్ముడి”తో జనంలోకి ఎలా వెళ్ళాలి….

ఆంధ్రప్రదేశ్ ఉప ముఖ్యమంత్రి, జనసేన పార్టీ అధినేత పవన్ కల్యాణ్ మూడో పెళ్లి తెగదెంపు వ్యవహారం ఆయన కుటుంబ జీవితంలో కంటే, రాజకీయ సమీకరణల్లో భారీ మార్పు చోటుచేసుకునే అవకాశం కనిపిస్తోంది. 2014 వ సంవత్సరం వరకు ఆయన ఒక సినీ నటునిగా ముగ్గురు యువతులను వివాహం చేసుకున్నా ఎవరు లెక్క చేయలేదు. సినీ పరిశ్రమలో అది సహజమే అన్న భావనలో మూడు పెళ్లిళ్ల తంతు ఆయన వ్యక్తిగతమని వదిలేశారు.  రాజకీయాల్లో అవినీతి మచ్చలున్న నాయకులనే జనం పక్కన పెట్టారు,  పెడుతున్నారు. అలాంటిది పెళ్లిళ్ల మీద పెళ్లిళ్లు చేసుకొని విడాకులు ఇచ్చే రాజకీయ నాయకుణ్ణి సంస్కృతి, సాంప్రదాయాలు ఉన్న తెలుగు రాష్ట్రాల ప్రజలు దరిదాపుల్లోకి కూడా రానివ్వరు. మూడు పెళ్లిళ్లు చేసుకోవడమే కాదు, వాళ్ళతో నలుగురు పిల్లలకు జన్మనిచ్చి విడిపోవడాన్ని ప్రేక్షక  మహాశయులు   జీర్ణించుకోలేక పోతున్నారు. తెలుగు రాష్ట్రాల్లోనే కాదు పవన్ కల్యాణ్ కు నాలు దిక్కుల్లో ఉన్న అభిమానులు సైతం పెదవి విరుచుకుంటున్నారు. ముఖ్యంగా మొన్న రష్యా మహిళతో  విడిపోవడం పట్ల యువతులు, మహిళల్లో తీవ్ర అసంతృప్తి కనిపిస్తోంది. బాధ్యతాయుతమైన పదవిలో ఉండి మూడో భార్యకు కూడా విడాకులు ఇవ్వడం పవన్ అవివేకంగా భావిస్తున్నారు. మొదటి రెండు విడాకుల సందర్భంగా జరగని చర్చలు మూడో విడాకులకు వచ్చే సరికి రచ్చబండల వద్దకు చేరాయి అంటే పరిస్థితి అర్ధం చేసుకోవచ్చు. మంగళ, బుధ వారాల్లో నలుగురు చేరిన ప్రతి చోటా పవన్ విడాకుల ముచ్చట్లే వినిపించాయి.

ఇదిలా ఉంటే, ఈ మూడో విడాకుల పరిణామాన్ని జనసేన శ్రేణులతో పాటు కూటమి పార్టీలైన తెలుగుదేశం, భారతీయ జనతా పార్టీలు క్షుణ్ణంగా సమీక్షిస్తున్నాయి. తెలుగు రాష్ట్రాల్లో “నిత్య పెళ్ళికొడుకు”గా ముద్ర వేసుకున్న పవన్ కల్యాణ్ తో కలిసి రాజకీయంగా ఎలా ముందుకు సాగాలనే అంశంపై టిడిపి, భాజపా అధినాయకులు సమాలోచన చేస్తున్నారు. గత ఎన్నికల్లో వైసీపీ లోపాలను, చంద్రబాబు బలహీనత (అరెస్టు వ్యవహారం)ను ఆసరాగా చేసుకొని కూటమిలో చేరే అవకాశం దక్కించుకున్న జనసేన ఇప్పటికి తెలుగుదేశం పార్టీ బలం పైనే గెలుపు ఆశిస్తోంది. మొన్న స్థానిక సంస్థల ఎన్నికల్లోనూ వైసీపీ పై ఉన్న వ్యతిరేకతతో మరో మార్గం లేక టిడీపీ ప్రాబల్యం ఉన్న ప్రాంతాల్లోనే “సేన” నెగ్గుకు వచ్చింది. దీనికి విజయవాడ మేయర్ గెలుపు ప్రత్యక్ష ఉదాహరణ. ఒక అగ్రకులం బలంగా ఉన్నప్పటికీ “సేన” అభ్యర్థి నెగ్గుకొచ్చాడంటే ఓటింగ్ లో టిటిపి ప్రభావాన్ని అంచనా వేయవచ్చు. చంద్రబాబుతో జైలులో సానుభూతిగా కలిసి రాజకీయ పావులు కదిపి శాసన సభ ఎన్నికల్లో సీట్లు దక్కించుకున్న విషయం బహిరంగ రహస్యమే. అంతేకాదు, బాబు మంత్రివర్గంలో పదవి దక్కించుకొని జనసేన  ఆలోచనలు, సిద్ధాంతాలను పక్కనపెట్టి వ్యూహాత్మకంగా “సనాతన ధర్మ” నినాదాన్ని ఎత్తుకొని కట్టూ, బొట్టూ మార్చి క్రమంగా బిజెపికి దగ్గర కావడం మొదలు పెట్టారు.  పవన్  రకరకాల మార్గాల్లో మోడీ దృష్టిలో పడే ప్రయత్నాలు చేశారు. సినీ నటునిగా, చంద్రబాబు మంత్రి వర్గంలో భాగంగా ఉన్నందుకు మోడీ సైతం భాజపా భవిష్యత్ ని దృష్టిలో పెట్టుకొని మోడీ సైతం పవన్ తో సఖ్యతగా ఉన్నారు.

మూడో విడాకుల తర్వాత చంద్రబాబు తన పరిపాలన పై ప్రజల్లో విశ్వసనీయత, టిడిపి భవిష్యత్ గురించి ఆలోచించే పరిస్థితి ఏర్పడింది. ఎన్టీఆర్ వివాదానికి సంబంధించి ఒక్క అంశం మినహా తెలుగు రాష్ట్రాల్లో  ముఖ్యమంత్రిగా చంద్రబాబు పాలన తిరుగు లేనిదనే భావం ప్రజల్లో ఉంది. ఆయన నాయకత్వం లోని టిడిపి పై ఆ పార్టీ నాయకులు, శ్రేణులో 30 ఏళ్లుగా గట్టి నమ్మకం ఉంది. విభజన తర్వాత ఆంధ్రప్రదేశ్ లో రెండో సారి కూడా అధిక మెజారిటీతో బాబుకి అక్కడి ప్రజలు అధికారం కట్టబెట్టారు. అందుకే జనం నమ్మకాన్ని బాబు బాధ్యతగా తీసుకొని రకరకాల అభివృద్ధి పనులతో ముందుకు వెళ్తున్నారు. దీనికి అండగా కేంద్రం లోని మోడీ ప్రభుత్వం సహకరిస్తోంది. ఇలాంటి తరుణంలో పవన్ కల్యాణ్ విడాకుల వ్యవహారం కూటమిలో తలనొప్పికి దారితీసేలా మారిందని టీడీపీ, భాజపా సీనియర్ నేతలు చెబుతున్నారు. ప్రభుత్వం లేదా కూటమి పార్టీల తరఫున ఏవైనా కార్యక్రమాల్లో మోడీ, చంద్రబాబులతో కలిసి పవన్ పాల్గొనాల్సి వస్తే ఇబ్బంది తప్పదనే అభిప్రాయం వ్యక్తం అవుతోంది. ముఖ్యంగా ఎన్నికల సమయంలో పవన్ ని పక్కన పెట్టుకొని ప్రజలకు హామీలు ఇచ్చే సాహసం చేయడం టిడిపి, భాజపా అగ్ర నేతలకు చాలా కష్టం అనే వాదనలు పుంజుకుంటున్నాయి. పవన్ కళ్యాణ్ సైతం ఆత్మ న్యూనత భావంతో ప్రజల మధ్య నీతులు వల్లించే ప్రసంగాలు చేసే అవకాశం ఉండదని రాజకీయ పరిశీలకులు పేర్కొంటున్నారు. ఈ సారి ఆంధ్రప్రదేశ్ లో జరిగే శాసనసభ, లోక్ సభ ఈ రెండు ఎన్నికలు ఇటు చంద్రబాబుకి మాత్రమే కాక కేంద్రంలో మోడీకి కూడా అత్యంత కీలకం. వచ్చే ఎన్నికల నాటికి ఆంధ్రాలో లోకేష్ ని పీఠం పైకి తీసుకురావడానికి బాబు ప్రయత్నం కాగా, కేంద్రంలో నాలుగో విడత భాజపా జెండా ఎగరాలి అనేది మోడీ ఆలోచన. ఇంతటి కీలక సమయం, ఎన్నికల సమరాల్లో పవన్ కల్యాణ్ తో జోడీ కట్టడం ఏ మేరకు ఫలితం ఇస్తుందనేది అగ్ర నేతల చర్చల్లో ప్రధాన అంశం కానుంది.

ఒక సినిమాలో పవన్ కల్యాణ్  చెప్పినట్టు “నాక్కొంచెం తిక్కుంది… దానికో లెక్కుంది…” అనే పదం రాజకీయాల్లో కుదరకపోవచ్చు. తెలుగుదేశం, భాజపా అగ్రనాయకత్వంతో సఖ్యత కోసం మొన్నటి విడాకులు అనే తిక్కకు ఆయన ఏ లెక్క చెప్తారో వేచి చూద్దాం..